Хэнтий аймгийн ирээдүйн хүний нөөцийг бэлтгэх, залуучуудынхаа сурч боловсрох боломжийг нэмэгдүүлэх зорилгоор хэрэгжүүлж буй “Нутгийн ирээдүй” хөтөлбөрийн 2026–2027 оны хичээлийн жилийн тэтгэлэгт хамрагдах оюутнуудтай гэрээ байгуулж, сургалтын төлбөрийн батламж гардуулах үйл ажиллагаа зохион байгуулагдлаа.

Тэтгэлэгт хамрагдсан оюутнууд нь МУИС, МУБИС, АШУҮИС, ХААИС зэрэг их, дээд сургуульд анагаах ухаан, нүүр ам судлал, мал эмнэлэг, мал аж ахуй, биотехнологи, математик, байгалийн ухаан, боловсрол зэрэг орон нутагт шаардлагатай мэргэжлээр суралцаж байна.

Үйл ажиллагааны үеэр тэтгэлэгт хамрагдах 11 оюутан, Хэнтий аймгийн Засаг даргатай гэрээ байгуулж, гэрээг баталгаажуулан, оюутан бүрт сургалтын төлбөрийн батламжийг гардууллаа.

Энэхүү гэрээгээр талуудын эрх, үүрэг, хариуцлагыг тодорхой болгож, оюутнуудыг сургуулиа амжилттай төгсөж, эзэмшсэн мэргэжлээрээ орон нутагтаа ажиллаж, амьдрахад дэмжлэг үзүүлэх зорилгыг баталгаажуулж байна.

“Нутгийн ирээдүй” хөтөлбөр нь зөвхөн сургалтын төлбөрийн дэмжлэг бус Хэнтий аймгийн ирээдүйн хүний нөөцөд оруулж буй хөрөнгө оруулалт юм.

Тэтгэлэгт хамрагдаж буй оюутнууддаа сурлага, хөдөлмөрийн өндөр амжилт хүсье.