Мэдээ мэдээлэл

ГАЛШАР СУМЫН БАЯНБАДРАЛ БАГИЙН МАЛЧИН 3.БАТ-ӨЛЗИЙД АЙМГИЙН АВАРГА МАЛЧНЫ ШАГНАЛЫГ ГАРДУУЛЛАА

2025.02.26

“Элдэв эрдэнэт” хэмээгч модон могой жилийн сар шинийн босгон дээр Хэнтий аймгийн Галшар сумын Баянбадрал багийн малчин 3.Бат-Өлзий хөдөлмөр зүтгэлээ үнэлүүлж, 2025 оны аймгийн аварга малчин цол хүртлээ. Өвөг дээдсээс өвлөгдсөн малч ухааныг хадгалан, залуу үедээ өвлүүлж яваа түүний гэр бүл мал аж ахуйн салбарт олон жилийн туршид хичээнгүйлэн зүтгэсний үр дүнд энэ нэр хүндтэй шагналыг хүртэж буй билээ.

Шагнал гардуулах ёслолд Хэнтий аймгийн Засаг даргын орлогч Б.Өнөрцолмон, Галшар сумын Засаг дарга Т.Энхчулуун, сумын ИТХ-ын дарга Г.Чинзориг, Аймгийн ИТХ-ын төлөөлөгч М.Дарьхүү, Д.Алтангэрэл нар хүрэлцэн ирж, хүндэтгэл үзүүллээ.

МАЛЧ УХААНЫГ ӨВЛҮҮЛЭН ХӨГЖҮҮЛЭГЧ ГЭР БҮЛ
3.Бат-Өлзий, түүний гэргий Б.Өлзийхутаг нар 20 гаруй жил мал маллаж, аж ахуйгаа өргөжүүлж ирсэн туршлагатай малчид. Дөрвөн хүүхэд өсгөж хүмүүжүүлсэн тэд нутагтаа аж төрж, уламжлалт малч ахуйг хадгалан авч үлдэхийн төлөө ажиллаж буй нь тэднийг үлгэр жишээч өрх гэдгийг харуулна.
Энэ гэр бүлийн малчин удам үе дамжин үргэлжилж байгаа нь онцлох зүйл.
Гэргий Б.Өлзийхутагийн аав Д.Бумчин гуай 1997 онд мянгат малчин болж, аймгийн аварга малчин цол хүртэж байсан бөгөөд тэрээр Хөдөлмөрийн гавьяаны улаан тугийн одонгоор энгэрээ мялаажээ. Малч удмын залгамж халааг авч яваа 3.Бат-Өлзий өнөөдөр ийнхүү өөрийн хөдөлмөрөө төрдөө үнэлүүлэн, эцгийнхээ замналыг үргэлжлүүлж байна.
АЙМГИЙН АВАРГА МАЛЧНЫ ШАГНАЛЫН БҮРЭЛДЭХҮҮН
Аймгийн аварга малчин болсон 3.Бат-Өлзийд цом, энгэрийн одон, мөн Хэнтий аймгийн Засаг дарга Д.Аюурбунийн гарын бэлэг гардуулсан юм. Энэхүү шагнал нь малчдын уйгагүй хөдөлмөрийг үнэлж, мал аж ахуйг хөгжүүлэх үйлсэд оруулсан хувь нэмрийг нь тодотгосон чухал урамшуулал билээ.
МАЛ АЖ АХУЙН АМЖИЛТ, ОНЦЛОГ
✅ Сүргийн бүтцээ оновчтой зохицуулж, үржлийн ажлыг шинэлэг аргаар удирддаг
✅ Өвөлжилтийн бэлтгэл сайтай, цаг уурын хүндрэлээс гарах туршлагатай
✅ Галшар нутгийн алдартай адууг өсгөн үржүүлэх чиглэлээр онцгой анхаардаг.

Малчин 3.Бат-Өлзий шагнал гардан авах үеэрээ "Энэ шагнал зөвхөн бидний хөдөлмөрийн үнэлгээ биш, малч ухаан, өв соёлыг залуу үедээ өвлүүлэх чухал хариуцлага гэж бодож байна" хэмээн хэлсэн юм. Түүний хувьд мал аж ахуй зөвхөн амьжиргааны эх үүсвэр бус, эх орноо тэжээгч, өв соёлын салшгүй хэсэг гэдгийг онцоллоо.

Аймгийн удирдлагуудын зүгээс малчдын хичээл зүтгэл, уламжлалт мал аж ахуйг хөгжүүлэхэд оруулж буй хувь нэмрийг өндрөөр үнэлж буйгаа илэрхийлж, тус гэр бүлийн амжилтыг сайшаалаа. Монголын малчин ухааныг өвлүүлэн хадгалж яваа 3.Бат-Өлзий, Б.Өлзийхутаг нарын хөдөлмөр, зүтгэлийг үнэлсэн энэхүү шагнал тэдний амжилтын эхлэл байг.