Мэдээ мэдээлэл
УЛСЫН АВАРГА МАЛЧИН Ж.БӨХЧУЛУУН ГУАЙ 50 ГАРУЙ ЖИЛ МАЛ МАЛЛАЖ БАЙНА
2024.02.03
Батноров сумын Идэрмэг багийн малчин Жавсанжавын Бөхчулуун сар шинийн босгон дээр “Улсын аварга малчин” болж шагналыг УИХ-ын гишүүн Ц.Идэрбат, аймгийн Засаг дарга Ц.Чогсомжав, сум орон нутгийн удирдлагуудын хамт гардуулан өглөө.
Ж.Бөхчулуун гуай багаасаа мал маллаж, 1976-1978, 1981-1991 онуудад “Социализмын зам” нэгдэлд үхэрчин, 1978-1981 онд Худалдаа үйлчилгээний ангид “Агент”, 1991 оноос Батноров сумын Идэрмэг багт Ардын аж ахуйтан, малчнаар өнөөг хүртэл хөдөө аж ахуйн салбарт 50 шахам жил хөдөлмөрлөж явна.
Тэрбээр нэг үе малаа өсгөж сум, аймагтаа хамгийн их малтай малчдын нэгээр тооцогдсон ч бэлчээрийн доройтол, гарцаас шалтгаалан малын тоонд бус чанарыг чухалчилж байна. 30 шахам тэмээ, 400 гаруй адуу, 5 хошуу 1000 гаруй малтай. Ботгоо уяж, номхруулан сургадаг. Хөхүүрийн тал, Хүлэг Боорчийн нутаг, аялал жуулчлалын эвентээ бодолцож адуундаа анхаарч байна гэв. Мөн сүүлийн хоёр жилийн хугацаанд Монгол оронд цас зудтай, цаг хүндэрч хавартай золгож байна. Үүнд залуу малчдын зүрх зориг мохох байдал анзаарагдлаа. Хашир туршлагатай малчдаасаа зөвлөгөө авч шантарч болохгүй гэдгийг тэрбээр захилаа.
Ж.Бөхчулуун гуай сүүлийн гурван жилийн хугацаанд 8 өрхийг 1371 малаар малжуулж, төллөх 100 эх малаас 100-117 хувиар төлөө бойжуулсан байна. Мөн сумынхаа төрийн байгууллагууд, ЕБС-тайгаа хамтран ажиллаж, нийгмийн хариуцлагын хүрээнд аливаа үйл ажиллагааг дэмжин оролцдог байна.
Тэрбээр 1984 онд сумын тарга хүчний аварга, 1985 онд үхэр сүргээр “Сумын мэнд сүрэгтэн”, 2002 онд “Мянгат малчин”, 2012 онд “Сумын сайн малчин”, 2018 онд “Аймгийн аварга малчин” болсон бөгөөд Ардын хувьсгалын 70, 80, 90-н жилийн ойн медаль, 2013 онд “Хөдөө аж ахуйн тэргүүний ажилтан” цол тэмдэг, 2023 онд Алтан гадас одонгоор тус тус шагнагджээ.
Аварга малчдад Засгийн газрын шагнал болох цом, агар зандан хувин, тэмдэг, үнэмлэх, өргөмжлөл, улаан халз бүхий 5 ханатай гэр, ХХААХҮ-ийн сайдын гарын бэлэг, аймгийн Засаг даргын гарын бэлгийн хамт гардуулан өгч байна.
Эх орныхоо эзэн болж, эрдэнэт мал сүргээ таван төрөл дээр нь өсгөж, Улсын аварга малчин болсон танд халуун баяр хүргэе.