Аймгийн Засаг даргын санаачилгаар “Зөвд уриалъя, Зөвлөлдөж шийдье” уулзалтыг өнөөдрөөс эхлүүлж Хэрлэн сумын ахмадуудынхаа санал бодлыг сонсож байгаа билээ. Өглөөний уулзалтыг 2 дугаар багийн ахмадуудтай хийсэн бол үдийн дараа 5 дугаар багийн 30 орчим ахмадуудтай уулзаж санал бодлоо солилцлоо.

Аймгийн Засаг дарга Ц.Чогсомжавын хувьд Хэнтий аймагт өрнөж буй үйл явдлууд, бүтээн байгуулалт, 100 жилийн ойн бэлтгэл ажлын талаар танилцуулсан бол ахмадууд гэрэлтүүлэг, хог, зам талбайн засвар үйлчилгээ, төрийн дээд шагнал, хүнсний бүтээгдэхүүний үнийн өсөлт зэрэг нэлээд өргөн хүрээг хамарсан асуудлуудыг асууж хариулт авлаа.

Хэнтий аймгийн хувьд жил бүр 2-3 тэрбум төгрөг төсөвлөж зам засвар, арчилгаа хийдэг. Тодруулбал 2021 онд Ханбүргэдийн уулзвар буюу 4 замын уулзварыг 2,3 тэрбум төгрөгөөр засаж өргөтгөсөн бол 2022 онд Хэрлэнгийн гүүр хүртэлх замыг 1,7 тэрбум төгрөгөөр хийж гүйцэтгэсэн. Энэ оны хувьд цагдаагийн уулзвараас төв цэнгэлдэх хүрээлэн хүртэлх 1,7 тэрбум төгрөгөөр шинээр зам тавьж байна. Мөн Хишигийн уулзвар, хийдийн суурин, авто тээврийн уулзварын зам, чингис хотын бохирын шугамыг шинээр солих ажил зэрэг бүтээн байгуулалтын ажлууд шил шилээ даран өрнөж байна. Харамсалтай нь Дорнод, Сүхбатаар аймаг руу явж байгаа том машинууд манай аймгаар дайрч өнгөрч замын даац хэтрүүлэх, хөрсний хувьд шавар ихтэй зөөлөн бүтэцтэй байдаг зэрэг шалтгаан нь замын бүрэн бүтэн байдалд сөргөөр нөлөөлж байна. Үүний нэг жишээ нь автотээврийн уулзварт үүссэн эвдрэл. Тус замыг 350 сая төгрөгөөр зайлуулах сувагчлалтайгаар засахаар төлөвлөж Хушингарын навч ХХК шалгарч ажлаа эхлүүллээ.