Эзэн Чингис хааны нутаг Хан Хэнтий аймгаар овоглож яваа эрхэм та бүхнийхээ энэ өдрийн амар амгаланг айлтган мэндчилье.
Бид иргэндээ ээлтэй аймаг болох зорилгоор 2018 оныг “Гэр бүлийн хөгжлийг дэмжих жил” болгон зарлаж сар бүр томоохон ажлуудыг хийж байгаа билээ. Өнгөрсөн 5 дугаар сард Хэнтий аймгийнхаа 18 сум 88 багийн иргэдэд хүрч, төрийн үйлчилгээг үзүүлж, тулгамдсан асуудлыг нь шийдвэрлэлээ. Энэхүү ажил иргэдийн маань сэтгэлд хүрсэн сайшаалтай ажлуудын нэг болсон тул 9 дүгээр сард дахин багуудаараа тойрохоор бэлтгэлээ хангаж байна. Мөн 6 сард гэр бүлийн гишүүн бүрийн эрүүл мэндэд анхаарах сар болгож 18 сумынхаа иргэдэд эрүүл мэндийн цогц үйлчилгээг хүргэхээр боллоо. Иргэд төрийн үйлчилгээг авахаар ирэх биш, төр иргэндээ очиж үйлчилдэг болохыг бид зорьж байна.
Тиймээс иргэдэд хүрэх төрийн үйлчилгээний чанар хүртээмжийг дээшлүүлэхийн тулд төрийн албан хаагчдыг чадвахжуулах, тэдний ажиллах орчин нөхцөлийн сайжруулах нь зүйн хэрэг юм. Тиймээс “Бүх нийтийн эрх зүйн боловсрол” дэд хөтөлбөрийг боловсруулж 2017 онд Удирдлагын академи, Төрийн албаны зөвлөл, холбогдох төрийн захиргааны төв байгууллага, төрийн бус байгууллагуудтай хамтран 82 удаагийн сургалтыг зохион байгуулж давхардсан тоогоор 10885 төрийн албан хаагчид хамруулсан бол 2018 он гарсаар 34 удаагийн сургалтад 2900 гаруй төрийн албан хаагчдыг хамруулаад байна. Мөн улсдаа анх удаа Удирдах ажилтны 1,2 дугаар зөвлөгөөний амжилттай зохион байгуулсан билээ.
Түүнчлэн энэ онд 22 тэрбум гаруй төгрөгийн бүтээн байгуулалтын ажлууд манай аймагт өрнөх бөгөөд төрийн 4 байгууллага шинэ байртай болноо. Үүнд Стандарт хэмжилзүйн хэлтэс, Татварын хэлтэс шинэ байраа барьж эхэлсэн бол Цагдаагийн газар, Хөдөлмөр халамж үйлчилгээний газрууд тун удахгүй барилгын ажлаа эхлүүлэхээр бэлтгэл ажлаа хангасан.
Энэ онд Хан Хэнтий аймаг байгуулагдсаны түүхт 95 жилийн тохиож байгаатай холбогдуулан нутаг оронд маань бүтээн байгуулалтын ажлууд өрнөж байна. Ирсэн зочид гийчдийн нүдийг баясгаж, сонорыг мялаахаар олон сайхан ажлуудыг санаачлан хийж эхлүүлээд байгаа тул Хан Хэнтий нутгаараа овоглодог, Их эзэн Чингис хааны үр сад та бүхнийг нутаг орноо зорин ирж сайхан наадахыг уриалж байна.
Таныг хүндэтгэсэн Хэнтий аймгийн Засаг дарга Н.Ганбямба